الفنان "شريف رمزي" ينتمي لعائلة فنية كبيرة، ولكن وعلى الرغم من أن والده من كبار منتجي الأفلام السينمائية إلا أنه رفض أقصر وأسرع الطرق وقرر أن يشق طريقه بنفسه ويبدأ واحدة واحدة..
لا تشغله كثيرا البطولة فردية ولا جماعية المهم أن ينجح الفيلم ويعجب الجمهور، لأنه -على حد تعبيره- مشواره لسة طويل...
دخل عالم الدارما التلفزيونية مؤخرا بمسلسل "أحزان مريم"...
"بص وطل" قابلت "شريف رمزي" فكان هذا الحوار...
"شريف رمزي" دخل الفن من البوابة العائلية؟
بالتاكيد لما الواحد بيتولد ويلاقي نفسه في بئية فنية بيحب الفن تلقائيا، جدي كان "صلاح ذو الفقار" وعمتي "هدى رمزي" وإخوة جدي "عز ومحمود ذو الفقار"، ووالدي الموزع "حسن رمزي".. كان لازم أحب الفن.
في "أسرار البنات" كنت صغير قوي.. ترشيحك ليه كان ازاي؟
كنت باتدرب على التمثيل في استوديو الممثل، وفجأة بعد أيام لقيت المخرج "مجدي أحمد علي" عايزني علشان "أسرار البنات"، السنياريو أعجبني جدا، كانت فرصة حقيقة بالنسبة لي، والفيلم ده غير حياتي!!
فيلم "أسرار البنات" بيناقش مشكلة مهمة جدا في الأسرة المصرية.. هل إنت شايف إن السينما المفروض تطرح القضايا بس ولا تتطرح القضايا ومعاها العلاج؟
السينما وظيفتها هي المتعة والاستمتاع وكونها تقدم قضية فده نجاح، ولو ماقدمتش فده مش مهمة السينما ومش شرط تطرح الحلول.
ليه الفيلم حقق نجاحا كبيرا في الوقت ده؟
لأنه كان بيناقش قضية بتهم الناس قوي والشباب لقوا نفسهم في الفيلم، كان نوعية جديدة وأول مرة الأبطال وجوه جديدة وأول مرة تمثل.
أول مرة ظهرت كانت بطولة وبعد كده اشتركت في بطولة جماعية.. إنت فين أكتر..!
الناس بمرور الزمن مش بتحسب البطولة الفردية ولا الجماعية، هتهتم بالأدوار الكويسة للفنان والناس شافتني في أدوار كويسة زي فيلم "من نظره عين" وحبوني وكان الدور صغيرا جدا.
"العيال هربت" و"أريد خلعا" و"من نظره عين" و"حالة حب" و"الإسكندر الأكبر" تجارب أثقلت موهبتي ومش فارقة بطولة فردية ولا جماعية المهم الفيلم يعجب الناس وينجح.
هل إنت شايف السينما دلوقت في شكل جديد وبداية جديدة في الشكل والمضمون؟
الزمن اختلف وذوق الجمهور اختلف عن زمان... طلعت موجة الأفلام الأكشن وبعدين بفتره أصبحت الجاسوسية، وبعدين الكوميدية وهكذا... الجمهور بيحب يتفرج على أنواع مختلفة دايما لكسر حاجز الملل.
الناس عايزه إيه دلوقت؟
الناس عايزه فيلم حلو تدخل وتستمتع بثمن التذكرة، وعايزة أفلام متنوعه باستمرار.
ليه السينما دلوقت قفلت نفسها على النجوم الشباب فقط، ومفيش تواصل بين الأجيال، ومافيش نجوم كبار مع صغيرين باستثناء عمارة يعقوبيان؟
دلوقت سن الشباب اختلف، دلوقت الشاب عمره 15 سنة المشكلة إن نجوم الشباب دخلوا السينما فجأة واتفرضوا على النجوم الكبار، والجمهور هو اللي فرضهم، وكمان زمان كان الفنانون بيقبلوا يشاركوا الشباب في الأفلام دلوقت بيرفضوا تماما.
الفنان "شريف رمزي" ابن المنتج والموزع "محمد حسن رمزي" هل طلبت من والدك أن ينتج لك فيلما؟
لا.. أنا رفضت ده وكنت عايز الجمهور يعرفني مش عن طريق والدي.... أنا لسة صغير على إنه يتنج لي، وبعدين المنتج مش بيختار النجوم وغلط أي فنان يفرض أولاده لأن الجمهور مش هيجامل حد..!!
استفدت إيه من تجربتك مع الأفلام القصيرة؟
تجربة مهمة لأني أخدت منها خبرة كبيرة.. صحيح بعضها عملتها مجاملة، ولكن كانت فيه أفلام باحبها... وعلى فكرة الأفلام القصيرة فيها مساحة كبيرة من الحرية ياريت تكون موجودة في الفيلم الطويل.
هل أنت مع إن الدرما والمسلسلات ممكن تحرق النجم السينمائي؟
بالعكس ده بيزود نجومية الفنان أكتر، وأنا باعمل للتليفزيون متأكد إن 70 مليون هيشوفني... هل ده وحش.
مسلسل "أحزان مريم" مثلته أمام النجمه "ميرفت أمين" اللي هي حماتك.. إيه شعورك؟
كنت سعيدا جدا لأني باحبها قوي؛ لأنها نجمة كبيرة وأم حبيبتي، وهي لم ترشحني للعمل زي ما الناس قالوا وكانت بتساعدني أمام الكاميرا، وهي بتحبني جدا.
"منّة حسين فهمي" خطيبتك.. ازاي التعارف حصل؟
الأهل كانوا بيعرفوا بعض من زمان، الفنان "حسين فهمي" كان صديق والدي لكن أنا و"منّة" اتعرفنا في حفل عائلي وحصل إعجاب وقررنا نتخطب.
هل توافق إن "منّة" تشتغل في الفن؟
لو كانت عايزة تشتعل كانت اشتعلت من زمان، وأنا على المستوى الشخصي مش باحب زوجتي تشتعل في الفن؛ لأن مهنتي مش مستقرة وماينفعش أنا ومراتي نشتعل في مهنة واحدة وده هيأثر على البيت والأولاد.
الزواج إمتى؟
إن شاء الله على أول السنة الجديدة.
إيه آخر أخبارك في السينما؟
بانتظر عرض فيلم "عجميسا" في العيد وباصور حاليا فيلم "ألوان السما السبعة"، مع الفنان "فاروق الفيشاوي" والفنانة "ليلى علوي".